Daga: Kabir Getso
Hukumar Bunƙasa Harkokin Noma Da Samar Da Abinci Na Zamani Ta Jihar Jigawa (JATA) ta karyata jita-jitar da ake yaɗawa cewa ana sayar wa manoman jihar kayayyakin noma daidai da farashin kasuwa, tana mai bayyana cewa ana sayar da su ne cikin rangwamen farashi domin tallafa wa manoma.
Daraktan Janar Na Hukumar, Dr. Saifullahi Umar, ne ya bayyana hakan yayin da yake ganawa da manema labarai a ofishinsa da ke Birnin Dutse, babban birnin Jihar Jigawa.
Ya ce wasu na yaɗa jita-jitar cewa gwamnatin jihar ta tsaurara farashin kayayyakin noma, yana mai bayyana wannan ikirari a matsayin “kanzon kurege” wanda ba shi da tushe balle makama.
Dr. Saifullahi Umar ya buƙaci al’ummar jihar da su yi watsi da irin waɗannan rahotanni, yana mai jaddada cewa gwamnatin Jihar Jigawa, ta hannun JATA, ta tanadi kayayyakin noma cikin rangwamen farashi domin ƙarfafa manoma da bunƙasa harkokin noma a faɗin jihar.
Daraktan Janar ɗin ya kuma yi kira ga al’ummar Jihar Jigawa da su ci gaba da bai wa Gwamna Malam Umar Namadi cikakken goyon baya da haɗin kai domin samun damar aiwatar da sabbin tsare-tsare da ayyukan raya ƙasa da gwamnatin jihar ke ƙaddamarwa.
